Mamlaka ya hifadhi ya Ngorongoro (NCAA) inatarajia kuwakutanisha zaidi ya wanawake 800 ndani ya hifadhi hiyo kwa ajili ya kutembelea vivutio vya utalii vilivyopo lakini pia kuwaonyesha fursa za uwekezaji.
Ziara hiyo ya siku moja, iliyoandaliwa na NCAA kwa kushirikiana na Kampuni ya Utalii ya Tanzanite Cooperate, itafanyika March 7, 2025, siku moja kabla ya maadhimisho ya Siku ya Wanawake Duniani tarehe 8 Machi 2025.
Akizungumza na waandishi wa habari jijini Arusha, Kamishna Msaidizi wa Uhifadhi wa NCAA, Mariam Kobelo, alisisitiza umuhimu wa siku hii, ambapo wanawake watapata nafasi ya kuungana na wenzao waliofanikiwa katika sekta ya utalii na pia kugundua fursa za uwekezaji.
“Katika kuadhimisha Siku ya Wanawake Duniani, tumeandaa ziara ya siku moja ndani ya eneo letu la Ngorongoro, lenye vivutio vingi vya utalii” amesema Kobelo na kuongeza;
“Wanawake watakaosajiliwa watapata fursa ya kutembelea, kukutana na wanawake wanaofanya kazi katika sekta ya utalii, na kuona fursa za uwekezaji ambazo zinaweza kuchangia uchumi wao na uchumi wa sekta hii,” alisema Kobelo.
Aliongeza kuwa usajili umeanza katika ofisi zao na wanatarajia wanawake 800 kujisajili kwa ajili ya safari hiyo, ambayo itagharimu sh170,000, ikiwa ni pamoja na kiingilio, chai ya asubuhi, chakula cha mchana, usafiri, muongoza wa watalii na kofia maalum itakayov worn wakati wa ziara hiyo.
“Ziara hii imetayarishwa ili kutambua na kuthamini mchango wa wanawake katika sekta ya utalii, ikiongozwa na Rais wetu Samia Suluhu Hassan, ambaye ameonyesha juhudi kubwa kurejesha hadhi ya sekta ya utalii baada ya janga la COVID-19,” alisisitiza Kobelo.
Mkurugenzi wa Kampuni ya Tanzanite Cooperate, Eline Mwangomo, alieleza kuwa magari yote ya safari yataondoka kutoka ofisi ya Mkuu wa Mkoa saa 12:00 asubuhi, Ijumaa tarehe 7 Machi 2025, kuelekea Hifadhi ya Ngorongoro na kurudi jioni.
Mwakilishi kutoka ofisi ya Mkuu wa Mkoa wa Arusha, Thabea Mollel, aliwataka wanawake kutoka mikoa mbalimbali kufika siku moja kabla ya safari ili kuepuka usumbufu wowote.
Maadhimisho ya Siku ya Wanawake Duniani yanatarajiwa kufanyika tarehe 8 Machi 2025, ambapo tukio la kitaifa litaadhimishwa mkoani Arusha likiongozwa na Rais Samia Suluhu Hassan.
Mwisho.